weather-image
27°

Oberall „Wellness“!

WI KÖRT PLATT

WI KÖRT PLATT

elauhnt: gelohnt ümmesüss: umsonst

Dräpen: Treffen

rüke: rieche

Feotbodden:

Fußboden reinefieren: säubern

teolesst: zuletzt

Lessten Sünnabent un Sünndag güng et in’n Hamelnschen Weserberglandzentrum allet rund ümme use Fruuslüe. Miene Ehegeliebte wolle ook hengahn un sek da seo’n betjen ümmekieken. Ierst harre ek keine Lusten, aber denn was ek doch neip-lichtern un et het sek elauhnt! Worümme, will ek jök vertellen: Et gaff da oberall for ümmesüss Schokolade, Gummibärchen un Bolschen teo probeiern un man konne sogaar mannich-einen Kugelschreiber meenöhmen.

Na jaa, dat mehrste was doch for dei Hübschesten von ösch Minschenkinnern, for use bäteren Hälwten. Un man glöfft gaanich, wat se sek allet for deren Wellness utdenken deot: Öhr Bad schall ne Wellness-Oase weern, un dafor gifft et Badekerzen, Badetörtchen un Badepralinen, un hinnerher könnt se bie Massagekerzen relaxen?

Oder se legget sek up’n Anti-Stress-Wohlfühlkissen ut Australien. Uppen annern Stand fund miene Lüttje handgesiebte Naturseepen. Miene Frünne weert sek wunnern, wenn ek bie’n negesten Dräpen rüke as ’ne Huri ut’n Paradeise. As ek denn noch läsen mosste: „Ahnen Sie Natur!‘, was ek doch platt, denn dichte daneben stund „Zauberlippenstifte entfalten Ihre Schönheit“. Denn heste ierst Falten, kannste se mee „meso beauty lift“ weer weg kreigen! Denn konne ek in’n besten „Denglisch“ läsen, ek könne mien „Body designen“, dör „Bodyforming“ weer fit weern, in seute „Badeschokolade“ swemmen gahn un damee mienen ganzen Body weer in’n Swung bringen, da bleiw mek doch dei Spucke wege! - Tja, sülmst for use Lüttjesten gaff et seo’n 4teiliget Set „Play & Clean“ un noch’n Rollout „Kid“. Wenn use Lüttjesten an’n Dische oder uppen Feotbodden kleckern, denn schöllt se dat woll sülmst reinefieren? – Twischendöör hebbe ek mek denn maal vor’n Speegel estellt un mien Gesichtsface kontrolleert, denn da konne ek an einen Stand läsen, dat’n dör ergometrische Gesichtsvermessung teo’n optimalen Schnitt komen könne?

Tja, aber teolesst gaff et naa all‘ düssen Tüddelkraam for mek as gestannenet Mannsbild doch noch en „Highpoint“, ümme bie’n Denglisch teo bleiwen: Dei Modelle von Atelier Kehn uter „Münchhausentown“! Was ne echte Ogenweide, düsse hübschen Kleeder for’n Abent, for’n Ball, for ne Hoochtiet un annere Amusements! Allet „first class“ un ierst de mehrstens junge, hübsche Inhalt, de konne ösch Mannslüen woll gefallen!

Anzeige
Weiterführende Artikel
    Anzeige
    Anzeige
    Kommentare