×

Himmel und Erde

WI KÖRT PLATT

Dei mehrsten Minschen hänget doch bannig an’n Summer, anner Sunnen, drömmet jümmer von’n Feerjen anner See un kieket siuerpöttsch, wenn ek denn anfange, von’n Harvest teo vertellen. Ek late nix uppen September, iusen Harvestmaant oder Scheiding, un ook nix uppen güldenen Oktober, iusen Wienmaant oder Gilbhart, komen! Tja, un worümme bün ek woll för’n Harvest? Dat will ek jök verklaren: In’n Harvest kannste, wenn diu in’n Freuhjahr nich teo fiul wörest, in dienen Garen arnten. Sühste woll, ek plante jümmer noch seo’n paar Reigen Kartuffeln un konne in düssen Jahr besonners dicke arnten. Eine von düssen

dicken hebbe ek „Athleten-Torso“ edofft, miene Ehegeliebte meine aber, düsse sessteihn (16) cm hoge Kartuffel wöre eher en „Monster“! Na jaa, laat se man, denn ober de tweiten wören wi ösch rasch einig: Dei is sogaar twintig (20) cm lang un suiht iut as ne eole Schildkröten, dei sek neiplichtern in iuse Welt ümmekieken deit. Doch teorügge teo mienen veelen dicken Kartuffeln: Ek freue mek al lange up miene eigenen Kartuffelpuffer! Vorichten Sünnabent harre ek al en Vörsmack: Inner Ohrschen Gutsgärtnerei gaff et seo’n Kartuffelfest: Da konnste dek satt äten an Puffer oder Folienkartuffeln neeb’n Keoken un veelen anneren. Tja, un nu is miene bätere Hälwte an de Reige: Ek mott denn dei Kartuffeln iutseuken, schillen, reiwen un dei Zipollen afpellen. Se reuert denn allet teohaupe un denn rinter in twei Pannen mee heiten Sunnenblomenöllje. Eine recket nich, denn bie’n Kartoffelpuffern weert jümmer noch’n paar annere „Lickemuilers“ inelaet. Aberst bienahe härre ek et vergäten: Vorichte Weeken gaff et bie ösch vorwech „Äppel un Kartuffel“, up hoochdütsch „Himmel und Erde“. Tja, dateo nöhmet wi jümmer use eigenen seutsiuren Boskoppäppel, up 500 g Kartuffeln komet ca. 125 g Äppel, kannste ook’n paar mehr nöhmen naa dienen Smack, Schinkenspeck mee Zipollen in Fett anbraen un in’n Kartuffelbrei reuern. Vandage löppet mek noch et Water in’n Munne teohaupe! Un, glöffstet oder glöffstet nich, upewarmet smecket et denn noch bäter, denn isset ierst seo richtig döretogen!

Ach, un bienahe härre ek et vergäten: Reine Kartoffeln sünd doch veel gesünder as düsse Pommes frites, dei in’n eolen Fett swemmet un dek dei Punde up dei Ribben spendeert!

Wi Kört Platt

drömmet: träumen siuerpöttsch: un-

freundlich

Harvest: Herbst

fiul: faul arnten: ernten

edofft: getauft

neiplichtern: neugierig

Vörsmack: Vorge- schmack

schillen: schälen

Zipollen: Zwiebeln

Lickemiuler: Fein- schmecker

Ribbe: Rippe




Anzeige
Weiterführende Artikel
    Anzeige
    Kontakt
    Redaktion
    Telefon: 05041 - 78932
    E-Mail: redaktion@ndz.de
    Anzeigen
    Telefon: 05041 - 78910
    Geschäftsanzeigen: Anzeigenberater
    Abo-Service
    Telefon: 05041 - 78921
    E-Mail: vertrieb@ndz.de
    Abo-Angebote: Aboshop

    Keine Zeitung bekommen? Hier zur Zustell-Reklamation.
    X
    Kontakt